قصيده للشاعر سبيت بن حسن العوش بن بدر النهدي

شغلت جوالي بدعوى التصفاح
واخذت لي جوله اشوف الجدايد

وانا بصدر البيت جالس ومرتاح
اقرا خبر كل الديار البعـــايـــــد

زرت الدول من دون مسرى ومسراح
واخذت لي من كل بقعه فوايد

قوقل بفضل الله قد صار مصباح
غطاك ياسوق الصحف والجرايد

وانا بمجلاسي مريح ومسباح
وجهت بانظاري لكل البدايد

وعرفت بان القرم يقدح تقداح
الروس فيها يشعلون الوقايد

والبوسنه راحت وقوقازنا راح
لفغان فيها القتل والجهل سايد

وبغداد ذي قد كان له نجم وضاح
الفرس لعبت به خباث العقايد

والشام ريح الدم من توها فاح
من عقب ماكانت هبوب وبرايد

وفالمسجد الاقصى مراح وتمذراح
للكفر في وسطه جنود وجنايد

وارض الكنانه جيش الامه ولرباح
لازال لا ذلحين محتاج قايد

وبرقه تنادي في عشاها ولصباح
الامن مطلبها ولا هو بعايد

وجزاير البربر تنقح تنقاح
من كثر ثوراته تهدد هدايد

وفي دار عقبه ثار صايح وصياح
البوعزيزي ذي قد قدح فالزنايد

صدر بها لا ارض حمير وصرواح
ذي كم لها تشكي حروب ونكايد

وفي القاره السمراء مناكير واتراح
الحرب هو والفقر فيها قنايد

والسيخ في كشمير ملقين ذباح
وفي بورما للدين حاصد وبايد

واحنا نفاخر بالغناء والتميلاح
نلهث ورى التغريب من دون فايد


بديارنا نشعل قناديل لفراح
وجيرانا تلقى التعب والشدايد

نكذب على انفسنا ونهوى التمداح
وصدورنا ملاا سموم وحقايد

ياطير يالي فوق لغصان صداح
لاتحسب الصياد مبعد ونايد

مادمت تتغنى وفي يده اسلاح
لك يوم مهما طال ياتيك صايد

هذه علوم الدار اللام واجراح
ومن حيث ماوجهت همي تزايد

الامنا لازال تطغى على الساح
واوضاعنا يبكي لها كل كايد

طفيت جوالي وله دمع سياح
مثلي بكا ماقال بوقف محايد

...............